Дејвис: Британскиот Парламент нема да го поддржи договорот за Брегзит
Предлог-договорот за истапување на Велика Британија од ЕУ, што го постигнаа преговарачите на Брисел и Лондон, нема да добие поддршка во Парламентот во Вестминстер, изјави синоќа поранешниот британски министер за Брегзит, Дејвид Дејвис.
– Поверојатно е дека Долниот дом (на Парламентот) ќе го отфрли договорот, отколку дека ќе и изгласа недоверба (на премиерката Тереза Меј). Не гледам како договорот може да помине, изјави Дејвис во интервју за американската телевизија Си-Ен-Би-Си.
Според Дејвис, поради ваквото очекувано сценарио, Лондон треба да излезе со алтернатива на договорот.
Дејвис поднесе оставка на министерската функција во јули годинава, незадоволен од одликата на премиерката Меј за зачувување на одредени врски меѓу Велика Британија и ЕУ и по Брегзитот.
Во меѓу време, како што јави ДПА, ирскиот министер за надворешни работи Сајмон Коувни им порача на британските пратеници да го поддржат договорот или во спротивно да се подготвуваат за состојба на хаос во услови на Брегзит без договор.
– Треба да направат избор меѓу овој договор и хаотиен Брегзит без договор, изјави Коувни.
Доколку британскиот Парламент не го поддржи договорот, тогаш Велика Британија би можела да ја напушти Унијата на 29 март 2019 година, без регулирани услови за таа постапка и без решени идни односи меѓу двете страни.
