Сообраќајците воведуваат дисциплина по гостиварските улици

Возачите кои управуваат неисправани возила по гостиварските сообраќајници се најдоа на удар на сообрќајната полиција. За возењето без исправни сопирачки, светлосни уреди, системи за управување и истечена регистрација 22 возачи добија прекршочни платни казни, а за четворица се поведени прекршочни постапки.

– При контролата, кај 11 возила откриена е неисправност на сопирачките, едно возило имало неисправен уред за управување, исто толку неисправни светлосни уреди, а четири истечена регистрација. На 22 возачи изготвени им се прекршочни платни налози и четири барања за поведување на прекршочна постапка. Во контролата, исто така, констатирани се и осум други видови прекршоци, вели портпаролот на СВР Тетово, Марјан Јосифоски.

Од полицијата најавуваат засилени контролни активности на гостиварското подрачје и наредниве денови. Посебен акцент во нив ќе му биде ставен на паркирањето, пред се на улиците „Браќа Ѓиновски", „Илинденска", „ЈНА" и „Живко Брајковски". Воведувањето на ред по овие сообраќајници е важно и заради најавата на снежни врнежи, а погрешно паркираните возила во значителна мерка го отежнуваат отстранувањето на снегот од улиците и тротоарите во градот.

– Ќе се санкционираат сите погрешно паркирани возила на тротоари, крстосници и на пешачки премини, кои го попречуваат нормалното и безбедно движење на пешаците и другите учесници во сообраќајот. Контролните активности ќе се реализираат не само во текот на денот, туку и во доцните вечерни часови, кога и најчесто се чинат ваквиот вид прекршоци, потенцира Јосифоски.