Започна со работа канцеларијата за поттикнување на развој во земјоделието во Македонска Каменица

Повторно започна со работа подрачната единица на Агенцијата за поттикнување на развој во земјоделитето во општина Македонска Каменица. Како што информира Соња Стаменкова, градоначалничката на општина Македонска Каменица канцеларијата е сместена во општинската зграда.

-Отворањето на канцеларијата на Агенцијата за поттикнување на развој во земјоделитето е помогнато од општина Македонска Каменица. Истата се наоѓа на вториот кат од општинската административна зграда, а во канцеларијата е вработено стручно лице, дипломиран иженер – агроном чија задача ќе биде доближување на земјоделците до новините и тековните развојни процеси што разните владини и странски фондови ги нудат за развој на земјоделието, вели Стаменкова.

Додава дека прием на странки ќе се врши секој работен ден од 08:30 до 16:30 часот. Основна дејност на канцеларијата ќе биде прием на апликации од тековните програми, како и консултантски услуги од областа на земјоделието во врска со развојните програми и тековни проекти.