Кривична пријава за двајца полицајци поради прекумерна употреба на сила

Кривична пријава е покрената против двајца полицајци поради прекумерна употреба на сила при извршување на службената должност, при што предизвикале телесни повреди.

Одделот за внатрешна контрола, криминалистички истраги и професионални стандарди при МВР поднел кривична пријава против С.С.(39) од село Подгорци, струшко и Г.К.(47) од село Пештани, охридско, полициски службеници во Полициската станица Охрид, поради постоење основи на сомнение за сторени кривични дела ,,малтретирање во вршење на службата” и „тешка телесна повреда”.

Полицајците завчера околу четири часот на улица „7-ми Ноември“ во Охрид, при преземање на службени дејствија во врска со претходно пријавен настан примениле средства за присилба при лишување од слобода на Б.Н.(18) од Охрид поради давање на отпор од него.

Пријавените, како што соопшти МВР, средствата за присилба ги употребиле несразмерно и неправилно и на Б.Н. му нанеле тешка телесна повреда. Против осомничените полициски службеници поведена е дисциплинска постапка пред надлежната комисија за сторено потешко кршење на работниот ред и дисциплина и истите се отстранети од работното место до завршување на постапката.