Петардите можат да убијат: Кампања против употреба на пиротехнички средства во Кавадарци

Петардите можат да убијат, кампања против употреба на пиротехнички средства се спроведува во Кавадарци, во организација на Секторот за превенција при Полициска станица од општа надлежност Кавадарци и Општинскиот Совет за превенција од малолетничко престапништво.

-Во рамките на оваа кампања, денеска беше реализирана превентивна акција, ученици од Основното општинско училиште “Тоде Хаџи Тефов, поделија над 50 едукативни пораки и цртежи на оваа тема, кои претходно самите ги изработија. Освен на случајните минувачи, пораки против употреба на петарди тие им подарија и на кавадаречкиот градоначалник Митко Јанчев и на Ристо Сакалиев, претседател на Совет на општина Кавадарци, рече Димитар Каракулев, инспектор за превенција и претседател на Советот за превенција од малолетничко престапништво.

Јанчев и Сакалиев ја поздравија оваа кампања, која има за цел заштита од употребата на петарди, со оглед на фактот што бројни луѓе во светот, страдаат токму поради својата непромисленост.