Запленети два килограма кокаин на скопскиот аеродром
Околу два килограма кокаин се откриени и запленити на Аеродромот во Скопје од страна на Царинската управа и Министерството за внатрешни работи. Со тоа, пред два дена, е спречен уште еден обид на криумчарење со наркотични дроги, известуваат од Царинската управа.
На 5.12.2018 година околу 20:30 часот со летот од Цирих, на влез во Република Македонија селектиран е детално прегледан патник државјанин на Република Венецуела.
При прегледот, во неговиот багаж пронајдено е околу два килограма бела прашкаста материја, која при проверка со тестер за дрога дала позитивен резултат за присуство на „cocaine hydrochloridе“, што индицира дека непознатата растителна материја е наркотична дрога кокаин.
По преземање на случајот од страна на инспекторите од Одделението за истраги при Царинската управа, а по наредба на јавен обвинител, непознатата прашкаста материја е доставена на вештачење со кое е утврдено дека станува збор за кокаин.
Вредноста на запленетата дрога, на црниот пазар во Република Македонија, изнесува околу 140.000 евра, додека истата при продажбата на мало би била повеќекратно зголемена и би достигнала вредност околу 570.000 евра.
Царинската управа на Република Македонија до надлежното Основно јавно обвинителство против осомничениот поднесе кривична пријава,заради постоење на основано сомнение дека сторил кривично дело „Неовластено производство и пуштање во промет на наркотични дроги, психотропни супстанци и прекурзори, соопштуваат оттаму.
