Голема хуманитарна акција во Прилеп
Во Прилеп, од денеска, до четврток, се спроведува хуманитарна акација насловена „Подај рака, биди човек".
Во пет маркети во градот се поставени кошници за донација на храна, а организатори на акцијата се Здружението „Епилепсија Македонија" и Црвениот крст со поддршка на прилепската локална самоуправа.
Дејан Бунески од Здружението „Епилепсија Македонија" наведе дека сите добронамерници кои ќе пазарат во маркетите ќе имаат можност да донираат во кошницата.
-Оваа хуманитарна акција е насловена како „Подај рака, биди човек" и нашата цел е да собереме храна пред големиот христијански празник „Св. Никола", зашто светецот е заштитник на нашиот град. Сакаме да се водиме по тоа што Свети Никола претставува заштитник на сиромашните, на децата, голем добротвор. Во тој поглед сакаме и ние да го доловиме хуманитарниот момент и да дадеме придонес, односно да помогнеме таму каде е најпотребно, објасни Бунески.
Истакна дека со хуманитарна акција се надеваат дека ќе допрат до срцата на оние дечиња кои не може да си овозможат новогодишно пакетче и на тој начин да ги усреќат, како што рече, па и тие да ја почуствуваат новогодишната магија како и сите други.
Во соработка со прилепскиот Центар за социјални работи ќе се определат ранливите семејства и пред 19 декември ќе им се поделат пакетите.
Организаторите сакаат да воспостават традиција на хуманитарни акции и за сите поголеми христијански празници како што се Божиќ, Велигден, Водици.
