Отворен нов пензионерски дом во Неготино

Нов пензионерски дом за пензионери со мали пензии беше отворен денеска во Неготино. Се работи за осум посебни станови во кои се сместени два брачни пара и шест други пензионери со ниски примања. Целиот проект е околу девет милиони денари, а е инвестиција на Здружението на пензионери од овој град.

-Пред да ги доделиме становите на наши пензионери, за кои ќе плаќаат по 1.200 денари месечно, објавивме оглас на кој можеа да учествуваат сите оние кои немаат дом, а се со минимални примања, појасни Петар Захарчев, претседател на Здружението.

Тој нагласи дека во изминатиот период континуирано имаат активности со кои се помага на оние пензионери на кои им е неопходна помош.

-Знаеме да дадеме еднократна помош за пензионери со минимални пензии, а за нив субвенционираме и половина од средствата за максимум десетдневно бањско лекување.

Освен домаќинското работење и хуманите активности, тој ги спомена и спортските, културните и забавните, со кои се трудат да го направат поубав животот за лицата во третото доба.

Неготинчани кои добија станови, изразија задоволство што добија покрив над глава и услови за достоинствен живот.