Втора награда за македонски автори на стрип-фестивал во Србија
Стрип-авторката Катерина Николовска-Тери од Скопје и сценаристот Александар Стеванов од Штип в петок ќе ја добијат втората награда за стрипот „Мачорот кој сакаше да стане крал на светот“ на Меѓународниот стрип-фестивал кој вторпат се одржува во Ваљево, Србија.
Како што информираат од Стрип-центарот на Македонија (СЦМ) со седиште во Велес, за наградата одлучило тричлено жири, во состав Зоран Стефановиќ, управител на Центарот за уметност на стрипот – Белград, Миливој Костиќ, академски сликар, и Дејан Богојевиќ, мултимедијален уметник.
Во изјавата за медиумите сценаристот Александар Стеванов потенцираше дека исклучително многу го израдува веста за наградата за овој стрип со кој е врзан емотивно што е, како што вели, нетипично од повеќе аспекти.
-Прифаќајќи го ризикот наградата да ми биде одземена, би спомнал дека јас не сум вистинскиот автор на сценариото. Негови идејни творци, всушност, се моите некогашни домашни миленици – пекинезерчето Гизмо и мачорот Фигаро, чии палавштини само ги преточив во текстот од кој потоа Катерина создаде вистинско волшепство од линии и бои, посочи Стеванов.
Истиот стрип веќе освои награда за најдобро сценарио на конкурсот на најзначајната стрип манифестација во Македонија – Интернационалниот стрип салон во Велес.
Како што информира проект-менаџерот на СЦМ- Велес Томе Трајков, тие преку Стрип-центарот на Македонија од Велес, на овој меѓународен конкурс испратиле 17 стрип-дела од претежно млади и талентирани македонски автори, од кои дел ќе бидат поставени на изложбата на Ваљево.
-Со ова, Стрип-центарот на Македонија со седиште во Велес и овојпат зема активно учество во популаризација на актуелното македонското стрип-творештво, наведе Трајков.
