Пронајдена дрога во возило со скопски таблички на излез од Штип

Полициски службеници вчера попладне пронашле дрога при преглед на патничко возило „Фолксваген туран“со скопски регистарски ознаки, на излезот од Штип кон Велес, во кое се превезувале А.А.(30), П.Р.(27) и Е.П.(30), сите од Скопје.

Како што соопшти МВР, при ивршениот преглед на возилото вчера околу 16.25 часот, биле пронајдени две кеси во кои имало хероин, марихуана и прашкаста материја позната под името „катка“ за мешање на хероинот.

Лицата биле лишени од слобода и приведени во Полициската станица Штип.

По целосно документирање на настанот против нив ќе биде поднесена кривична пријава за сторени кривични дела „неовластено производство и пуштање во промет на наркотични дроги, психотропни супстанции и прекурсори“ и „овозможување на употреба наркотични дроги и психотропни супстанции“, казниви по член 215 и член 216 од Кривичниот законик на Република Македонија.