Нетанјаху: Израел е подготвен за голема воена операција во Појасот Газа

Израелскиот премиер Бенјамин Нетанјаху синоќа предупреди дека Израел е подготвен за воена операција „од големи размери“ во Појасот Газа.

– Ако Израел биде принуден на голема кампања ќе пристапи од позиција на сила и безбедност откако ќе ги исцрпи сите други можности, посочи Нетанјаху.

Хамас и Израел неделава се судрија во Појасот Газа што го зголеми стравот од нова војна. Во Газа досега војуваа трипати откако исламистичкото движење во 2007 година ја презеде власта во енклавата.

Нетанјаху најави голема операција во Појасот Газа во време кога Палестинците се подготвуваат за голем протест в сабота долж границата со Израел.

Жителите на Газа се повикуваат в сабота на голем протест, со што ќе се одбележи првата годишнина од движењето што придонесе за пораст на тензиите.

Од 30 март жителите на Појасот Газа секој петок демонстрираат под слоганот Марш за враќање. Протестите се организирани против израелската блокада и со барање за враќање на палестинските бегалци кои се протерани или побегнале по формирањето на Израел во 1948 година.