Илиевски: Не е точно дека пилотот на цесната не добил дозвола за слетување поради Ципрас

Дел од бугарските медиуми пренесоа дека пилотот не добил дозвола за слетување на скопскиот аеродром поради засилени безбедносни мерки поради присуството на грчкиот премиер Алексис Ципрас. Според нив на пилотот му било наложено да лета 30-тина минути во воздух и најверојатно останал без гориво. Илиевски ги демантираше овие гласини.

На прес-конференција претседателот на Комитетот за истраги на воздухопловни несреќи и сериозни инциденти – КИВНСИ Зоран Илиевски истакна дека увидот на воздухопловот кој завчера се урна во близина на Солунска глава во кој загина пилотот и неговото семејство заврши вчера на местото каде што се пронајдени остатоците на „цесната“ на 2,200 метри надморска височина.

Одговарајќи на новинарско прашање дали пилотот добил дозвола за слетување на скопскиот аеродром, Илиевски рече дека во неговото досегашно искуство, не сретнал некаде некој да побара дозвола за слетување поради некоја причина, а да не ја добил. Тој потсети дека вчера и директорот на М-НАВ Николче Тасески ја демантираше таа дезинформација дека пилотот не добил дозвола за слетување.

Илиевски рече дека дополнително ќе се побара информација од предвидувањата на метео службата од аеродромската контрола на летање на М-НАВ од аеродромот во Охрид, по која ќе се изјаснат дали времето влијаело на несреќата.

Претседателот на КИВНСИ појасни дека кога се работи за воздухоплов на генерална навигација, пилотите сами одлучуваат дали ќе летаат или не.

-Претходно во службата на навигацијата на било кој аеродром пилотот го најавува својот лет, бара информации кои му се потребни како што се метео информациите, прави план и го најавув, рече Илиевски и додаде дека пилотот сам си ја прави рутата, односно сам прави план на летање кој го доставува.

-На самото место направивме преку 400 професионални фотографии и видео снимки со професионален дрон што е многу важно за понатамошната истрага, појасни Илиевски.