Албанските туристи ја преферираат нашата земја како дестинација за сите четири сезони
По трет пат Република Македонија го претстави туристичкиот потенцијал на саемот за туризам ITF Тирана (EXPOCITY) кој се одржа на 05 и 06 април во главниот град на Албанија, Тирана. Земајќи го предвид фактот дека бројот на туристи од Албанија во 2018та година е покачен за 29% во споредба со 2017та година, а ноќевањата во истиот период за 31%, очекувањата за 2019та година се дека овој тренд ќе продолжи да се движи во нагорна линија, дури и со позабрзан интензитет од веќе регистрираниот.
За време на саемот учество земаа бројни туристички работници од околните држави кои ги промовираа дестинациите, регионите, градовите и туристичките атракции пред тур операторите од Албанија, албанските медиуми и потенцијални туристи. Дополнително, се организираа бројни панел дискусии на кои збор имаа лидери во областа на туризмот во Албанија и пошироко, а овозможено беше и онлајн вмрежување со hosted buyers преку систем за онлајн закажување состаноци - алатка која е употребувана од најголемите саемски манифестации.
Штандот на Република Македонија беше посетен од бројни официјални лица кои ја дадоа својата поддршка за соработката на државава со Албанија во поглед на туристичката размена, а меѓу нив беа министерот за туризам и животна средина на Република Албанија, г-дин Бленди Клоси, министерот за претприемништво на Република Албанија, г-дин Бледи Цуци, министерот за култура на Република Албанија, г-ѓа Елва Маргарити и амбасадорот на Република Македонија во Албанија, Н.Е. г-дин Данчо Марковски.
АППТ на саемот во Тирана ја претстави државава со колаж од активности кои може да се искусат во Република Македонија, а претставници од приватниот сектор беа Хотел Бистра и Хотел Парк. Потенцијалните туристи од Албанија покажаа интерес за посета на Охрид, Струга, Скопје и ски центрите Маврово и Попова Шапка, а албанските индивидуални патувачи сметаат дека малата дистанца во овој случај е предност. Она што и оваа година се потврди е дека албанските тур-оператори кои организираат кружни тури, не ја изостават Македонија од нивната агенда.
Имено, денес во Охрид во организација на Travel Shop, Work Shop и Skytour Албанија пристигнаа 60-тина тур-оператори од Европа, Америка и Азија, кои почнаа кружна балканска тура веднаш по завршувањето на саемот во Тирана. Тур-операторите во текот на утрешниот ден ќе имаат можност да се запознаат со туристичкиот потенцијал на нашиот главен град, а целта на турата е запознавање со регионот и можност за отпочнување на продажба истиот.
Со почит, АППТ
