Меркел и Макрон организираат конференција за Западен Балкан на 29 април во Берлин

Германската канцеларка Ангела Меркел и францускиот претседател Емануел Макрон ќе организираат кон крајот на април во Берлин конференција на која се поканети земјите од Западен Балкан, но и Хрватска и Словенија, како и претставници на Европската Комисија.

-На конференцијата на 29 април се очекуваат најмногу претставници од тие земји, изјави портпарол на германската Влада.

Главна тема на разговорите треба да биде стабилноста и поволниот развој на регионот.

Германската канцеларка и францускиот претседател сакаат да расправаат со гостите за посебните предизвици во регионот, особено за Србија и Косово.

Германија и Франција се иницијатори на т.н. Берлински процес, кој почна во 2014 година, со цел стабилизација на безбедноста и подобрување на политичките и економските односи меѓу земјите од Западен Балкан.

Идната конференција во рамки на Берлинскиот процес ќе се одржи на почетокот на јуни во Полска.