Австралиската полиција упадна во јавниот сервис, претресени новинари

Полиција упадна во седиштето на Австралискиот јавен сервис поради текстови за наводно недолично однесување на австралиските сили во Авганистан.

Службениците дошле во јавниот сервис Еј-Би-Си со налози за претресување двајца новинари и уредник на вести.

Истрагата е покрената поради серија истражувачки текстови од 2017 година, познати како Авганистански досиеја, во кои се „откриени тврдења за нелегално убивање и недолично однесување на австралиските специјални сили во Авганистан“.

Еј-Би-Си досиејата ги објави на 10 јули 2017.

Водечкиот синдикат на новинарите изјави дека претресите се „вознемирувачки образец на напади врз австралиската слобода на медиумите“.

Директорот на Еј-Би-Си, Дејвид Андерсон изјави дека рацијата „предизвикува легитимна загриженост за слободата на печатот“.

– Еј-Би-Си стои зад своите новинари, ги штити нивните извори и ќе продолжи да известува без страв или наклонетост кон прашања од националната безбедност и разузнавачки податоци кога има јасен јавен интерес, рече Андерсон.