Британија испрати посредник во Иран да преговара за ослободувањето на танкерот

Британија испрати свој посредник во Иран за да преговара за ослободување на нафтениот танкер кој пловел под британско знаме, соопшти Мохамад Мохамади-Голпајегани, шеф на кабинетот на иранскиот врховен лидер, пренесува полуофицијалниот ирански информативен портал Тасним.

Затегнатоста меѓу Иран и Британија се зголеми откако Исламската Република минатиот петок го заплени танкерот Стена Имперо, наведувајќи дека се судрил со рибарско бротче.

Мохамади-Голпајегани не даде повеќе детали за престојот на британскиот посредник, но иронично ја коментираше британската улога во иранските внатрешни прашања за време на колонијализмот.

– Земја која своевремено именуваше министри и правници во Иран дојде до точка кога испраќа посредник кој моли танкерот да биде ослободен, ја пренесува Тасним изјавата на Мохамади-Голпајегани.