Под слоганот „Биди херој на твоето срце“ светот го одбележува Денот на срцето

Низ целиот свет, со предупредување за важноста за одржување на здравјето на срцето, здравствените работници го одбележуваат 29 септември како Светски ден на срцето, а оваа година се слави на глобално ниво под слоганот „Биди херој на твоето срце“.

Според Светската здравствена организација, околу 17,9 милиони луѓе во светот годишно умираат од срцеви заболувања, а се проценува дека до 2030 година ќе има околу 23 милиони смртни случаи. Тоа е повеќе отколку смрт предизвикана од ХИВ, маларија или карцином.

СЗО посочува и предупредува дека дури 80 проценти од предвремените смртни случаи од срцеви заболувања можат да се избегнат со неколку едноставни промени во секојдневниот живот, како што се здрава исхрана, физичка активност и прекин на пушењето, редовна контрола на крвниот притисок и холестерол, со регулирање на телесната тежина и избегнување хроничен стрес.

На иницијатива на Светската организација за кардиологија, секоја година на 29 септември се слави Светскиот ден на срцето. Таа е водечка светска организација за подигање на свеста за кардиоваскуларни заболувања, вклучително и срцеви заболувања и мозочен удар.

Светската здравствена организација, во генералните препораки за физичка активност за возрасни во периодот од 18 до 64 години, препорачува два до три пати неделно кардио тренинг и фитнес двапати неделно.