Помпео на турнеја по Италија, Грција, Црна Гора и Република Македонија

Американскиот државен секретар Мајк Помпео до 6 октомври ќе биде на турнеја по Европа, во чии рамки ќе ги посети Италија, Ватикан, Црна Гора, Република Македонија и Грција.

Во делегацијата на Помпео е и заменик помошникот државен секретар задолжен за Европа и Евроазија, Филип Рикер, соопшти Стејт департментот.

Помпео, кој синоќа се сретна со италијанскиот премиер Џузепе Конте, ќе го посети Ватикан каде ќе се сретне со папата Франциск и кардиналот Пјетро Паролин, додека во Рим ќе има средба и со претседателот Серџо Матарела, како и со министерот за надворешни работи Луиџи ди Маја.

Американскиот државен секретар во петок ќе престојува во Црна Гора каде се планирани одвоени средби со претседателот Мило Ѓукановиќ, со премиерот Душко Марковиќ, како и со министерот за надворешни работи Срѓан Дармановиќ.

После тоа, Помпео ќе отпатува за Република Македонија каде ќе разговара со претседателот Стево Пендаровски, премиерот Зоран Заев и други владини претставници, а за време на обиколката на Охридско Езеро, предвидена е и посета на манастирскиот комплекс Перивлептос.

Помпео ја завршува својата европска турнеја во Грција каде треба да се сретне со премиерот Кирјакос Мицотакис и министрите за надворешни работи и одбрана.