Британските либерални демократи формираа коалиција против Брегзит

Три мали британски партии, Либерално-демократската партија, Зелените и влијателната партија од Велс Плејд Кумру, на еден месец пред изборите формираа коалиција која ќе се залага за останување на Велика Британија во Европската унија.

Претставниците на партиите се договорија дека ќе истакнат само по еден заеднички кандидат во 60 изборни окрузи – либералните демократи 43, Зелените – 10 и Плејд Кумру – седум, а за три окрузи допрво претстои да се договорат.

– Тој сојуз ќе придонесе за избор на повеќе пратеници кои поддржуваат останување во Европската унија, изјави шефицата на либералните демократи Џо Свинсон, која истакна дека со тоа сака да се постави „националниот интерес над интересот на сопствената партија“.

Британскиот премиер Борис Џонсон сака, од друга страна, Брегзит да се спроведе што е можно порано, а опозициските лабуристи ветуваат дека со Брисел ќе договорат нов договор за раздужување, кој ќе се стави на референдум, притоа нудејќи и опција за останување во ЕУ.