Во Холандија пронајдени 25 слепи патници во контејнер на брод што пловел кон Велика Британија

Во контејнер замрзнувач на бродот кој од Холандија тргнал кон Велика Британија пронајдени се 25 слепи патници, соопшти холандската организација Ријмонд Велиг.

На групата слепи патници им помогнале холандските служби за вонредни ситуации, а двајца биле пренесени во болница, додека останатите 23 биле однесени на „полициска локација“, се вели во соопштението на организацијата.

Бродот требало да исплови од холандското пристаниште Влардинген кон Феликстоу во Велика Британија.

Екипажот на бродот соопштил дека немало жртви, а во потрага за евентуално други слепи патници се користат кучиња трагачи.

Холандската телевизија НОС јави, повикувајќи се на неименуван полициски портпарол, дека станува збор за траект што се упатил кон Влардинген, близу Ротердам, откако биле откриени слепите патници.

Тие беа откриени скоро еден месец откако телата на 39 Виетнамци беа пронајдени во камион со ладилник во англискиот град Грејс.