Откриени три тони кокаин во подморницата запленета во Шпанија

Три тони кокаин се откриени во подморницата што беше запленета од страна на шпанската полиција, соопштија властите.

Националната полиција и Министерството за финансии соопштија дека ова е првпат шверцери на дрога да се обидат да ја пренесат до Европа со подморница.

Користењето подморници за шверц на кокаин е многу честа појава во САД.

Во меѓународната операција, во која беше запленета подморницата, учествуваа шпанската, португалската, американската и бразилската полиција.

Кокаинот од подморницата требало да биде префрлен на друг брод, но тричлениот екипаж ја напушти подморницата во саботата вечер кога беа пресретнати кај шпанскиот брег од страна на полицијата.

Двајца членови се од Еквадор и тие се уапсени на копно, а третиот успеал да избега.

Полицијата вчера со кран ја извлече подморницата на пристаниште за да може полесно да влезе внатре.

Властите велат дека подморницата можела да собере пет тони дрога.