Се дополнува катастарот на зеленило во Општина Кисела Вода

Со новите активности за воспоставување зелен катастар на Општина Кисела Вода ќе бидат опфатени јавните зелени површини во урбаните заедници Цветан Димов, Бирарија и дел од Кисела Вода.

Се работи за околу 1400 дрвја кои ќе влезат во зелената лична карта на Општината.

Како што соопшти Општина Кисела Вода, целта на овој проект е подобрување на управувањето со јавното зеленило, како и заштита на животната средина.

– За секое регистрирано дрвце ќе има податоци за степенот на апсорпција на штетни материи преку утврдените индикатори на штетност, неговата старост, потенцијалната опасност и потреба од сеча, а ќе се утврди и можноста за засадување на нови дрвца. И овие информации, како и претходно поставените кои се однесуваа на зеленилото во училиштата и градинките, ќе бидат поставени на официјалниот Катастар за зеленило кој ќе биде достапен и на официјалниот веб портал на Општина Кисела Вода. Активностите за надополнување на содржините ќе продолжат и во текот на наредната година.