Де Бруин: Се чувствувам добро во Сити и сакам да го исполнам договорот

Белгискиот репрезентативец Кевин Де Бруин е цврсто посветен на исполнување на неговиот договор со Манчестер Сити до летото 2023 година, иако има поголем интерес за него од Реал Мадрид и Барселона. Во интервју за „Спорт360“, тој сподели дека се чувствува одлично во составот на англиските шампиони.

– Се чувствувам пријатно во Манчестер Сити. Најмногу време играв за овој клуб, со исклучок на Генк. Сепак, јас бев и во младинските формации, што е сосема поинаку. Во Сити ми е добро затоа што сум среќен. Играм за еден од најдобрите тимови во светот и јас сум дел од најсилното првенство во светот. Моето семејство веќе се прилагоди на животот во Англија и моите деца се среќни, што е многу важно, започна тој.

Во однос на ждрепката за Лигата на шампионите, тој вели дека таа не е лесна, бидејќи нема мали екипи таму. Сити се среќава со Реал Мадрид во осминафиналето на најпрестижниот клупски фудбалски турнир, а првиот меч е на „Бернабеу“ во Мадрид на 26 февруари.

– Ако сакате да го освоите овој трофеј, треба да го победите најсилниот во Европа. Затоа сме професионални фудбалери. Сите ние сакаме да играме за трофејот во Лигата на шампионите, а на национално ниво – за Европската и Светската титула, прокоментира Де Бруин по прашањето.