Гутереш: Верските лидери да се борат со штетните пораки што поттикнуваат пораст на ентонационализам, говор на омраза и конфликт

Генералниот секретар на ОН Антонио Гутереш ги повика верските водачи да се борат со „неточни и штетни пораки“ што поттикнуваат пораст на ентонационализам, говор на омраза и конфликт во време кога во светот владее пандемија на новиот коронавирус.

Гутереш предупреди дека „екстремистите и радикалните групи се обидуваат да го искористат слабеењето на довербата во раководствата и да се хранат со ранливоста на луѓето за да ги постигнат своите цели“.

Тој додаде дека верските водачи би можеле да играат „клучна улога“ во борбата против предизвикот со коронавирусот.

Генералниот секретар посочи на вознемирувачкото зголемување на насилството врз жените и девојчињата во време кога се шири пандемијата.

Тој ги повика верските водачи категорично да го осудат таквото однесување и да ги поддржат заедничките принципи на партнерство, еднаквост, почит и сочувство.

Тој, исто така, ги повика верските водачи да се приклучат во борбата против дезинформациите за коронавирусот.