Грција го презеде претседателството со Комитетот на министрите на Советот на Европа
Грција денеска го презеде претседателството со Комитетот на министри на Советот на Европа, за време на состанокот што се одржа со видео конференција со претставници на 47 држави членови на најстарата паневропска организација, јави дописникот на МИА.
Министерот за надворешни работи на Грузија, Давид Залкалијани, ги презентираше резултатите од претседателството на неговата земја, додека министерот за надворешни / европски прашања на Грција, Милтиадис Варвициотис ги претстави приоритетите на грчкото претседателство во наредните шест месеци.
Со оглед на тековниот контекст, Грција избра да го стави своето претседателство под знакот на заштитата на јавното здравство и на одговорите на здравствената криза, истовремено почитувајќи ги човековите права, демократијата и правната држава.
Меѓу другите приоритети се независноста на судството и владеењето на правото, но и заштитата на ранливите деца и правата на помладата генерација во дигиталното образование, животната средина и социјалното поле.
На 4 ноември, Атина ќе биде домаќин на седницата на Комитетот на министри, која ќе ги собере 47-те министри за надворешни работи, како и на церемонијата за одбележување на 70-годишнината од Европската конвенција за човекови права. Потоа, Германија ќе ја наследи Грција како претседавач со Комитетот на министрите на Организацијата.
