Спасовски од Куманово: Излезете на гласање безбедно е

Носителот на листата од ИЕ 2 од коалицијата „Можеме“, Оливер Спасовски, денеска од пред спортскиот комплекс „Соколана“ од Куманово, апелираше до граѓаните да излезат на гласање, бидејќи е безбедно.

Тој рече дека сите се пред одговорност да се сочува се што е осигурано во изминатите три години и дека треба да се продолжи по правиот пат.

Во изјавата за медиумите, Спасовски истакна дека се обезбедени сигурни плати и пензии, перспективи за младите, сигурни евроатлански интеграции, додавајќи дека правиот пат значи сигурност.

Спасовски додава дека следуваат специфични времиња во коишто ќе треба да се продолжи со грижата за здравјето, бидејќи, како што нагласи, денес ја водат одговорни луѓе, следуваат и специфични времиња во економијата за која, додаде, исто така се потребни одговорни луѓе кои покажале што значи заштита на сечија инвестиција, бизнис и сечиј кров на главата.

Носителот на листата истакна дека можат и повеќе и подобро во периодот што претстои.

-Со СДСМ сте на сигурно и ве повикувам, излезете на гласање и гласајте за бројот 3 – СДСМ и коалицијата „Можеме“. На другата страна е режимот што чека шанса да се обнови. Зарем ќе му дадеме шанса повторно да помисли дека може да се врати. На таа страна, во тој мрак се луѓе избрикани од работа затоа што не работеле под партиски директиви. Се уценети бизниси и изолирана држава и блокирани перспективи за соединување со современиот свет. На таа страна се криминали, закани по живот, на таа страна се лаги и конструкции. На таа страна е ужас. ВМРО-ДПМНЕ е голема опасност за јавното здравје, за обнова на сиромаштијата и обнова на мракот и за обнова на режимот. Не смееме да го дозволиме тоа. Ниедна битка не е лесна, не е ни оваа. Ќе се бориме во која што се бориме да продолжат перспективите, рече Спасовски.

Тој се осврна на постигнатото членство во НАТО, посочувајќи дека сме на чекор со преговорите со ЕУ, со сочуван идентитет, како што рече, грижата е еднаква за сите.

Спасовски истакна дека покрај зголемени плати, пензии, зголемена е и социјална помош, а поддршка имаат и младите.

Со новата развојна економија, додава, ќе се затворат сите прашања што го блокираа развојот, и обезбедуваат сигурна иднина.

– Сакате ли сигурна иднина, отфрлете ја опасноста. Излезете на гласање. Сите здравствени протоколи за безбедно гласање се донесени. Изберете 3, изберете СДСМ и сигурност. Опасностите да ги оставиме во темните страници на историјата на коишто ќе бие испишано како заедно сме ставиле крај на остатоците од режимскиот систем за никогаш да не се повтори. Да се разбудиме на 16 јули спокојни дека сме го направиле потребното и сме ја осигурале и сегашноста и сигурната иднина на нашите деца, рече Спасовски.