Скопјанка 63 пати примила девизни средства од Турција, поднесена кривична пријава бидејќи не платила ПДД

Единицата за економски и компјутерски криминал- СВР Скопје при Бирото за јавна безбедност поднесе кривична пријава до Основното јавно обвинителство Скопје против Н.Ј.(56), поради постоење основано сомнение дека сторила кривично дело „даночно затајување“, казниво по член 279 од Кривичниот законик.

Пријавената Н.Ј. во текот на 2018 година, информриаа денеска од МВР, во 63 наврати реализирала приливи на девизни парични средства од повеќе физички лица од Р.Турција, по пат на брз трансфер на пари, во вкупен износ од 25.750 евра или 1.583.655 денари при што, со намера да одбегне плаќање на персонален данок на доход во износ од 10 проценти од износот на примените средства, не ги пријавила како друг доход и не поднела годишна даночна пријава за 2018 година до Управата за јавни приходи.

– Имено пријавената, согласно одредбите на член 12 од Закон за персоналниот данок на доход, била должна за овој износ да пресмета и плати персонален данок на доход во износ од 158.365,575 денари, кој претставува „износ од поголема вредност“, за кој го оштетила Буџетот на Република Македонија, стои во соопштението од МВР.