Министер на Филипини најверојатно повторно заразен со Ковид-19

Филипински министер тестиран е позитивно за коронавирусот пет месеци по првото дијагностицирање, соопштија денеска властите додека експертите испитуваат дали е можно тој повторно да се зарази.

Министерот за внатрешни работи Едуардо Ано, предводник на борбата на Филипините против коронавирусот, рече дека е тестиран позитивно за коронавирус во саботата, откако минатата недела имаше симптоми слични на грип.

Му беше дијагностициран коронавирус во март, но потоа не покажа знаци на болеста.

Студиите покажуваат дека заразените луѓе развиваат антитела околу една недела по инфекцијата или почетокот на симптомите.Но, научниците се уште се сомневаат дали телото создава доволно силен имунитет за да се одврати од напад на нов вирус и колку трае ваков имунитет.

Некои студии покажуваат дека пациентите кои се опоравуваат од Ковид-19 можат да изгубат имунитет по месеци, дури и неколку недели.

Претставникот на Министерството за здравство на Филипини, Марија Розарио Вергеире изјави дека симптомите на Ано се испитуваат за да се види дали станува збор за нова инфекција.

– Да не го нарекуваме повторна инфекција. Научната заедница се уште не прифатила дека тоа е можно, изјави таа.

Филипините бележат 160.000 случаи на инфекција, најмногу од која било земја во Југоисточна Азија, со повеќе од 2,6 илјади смртни случаи.