Белоруската опозиционерка Марија Колесникова е уапсена, тврдат нејзините соработници

Белоруската политичарка Марија Колесникова, една од ретките лидери на опозицијата која не е во егзил, утринава е уапсена во Минск, соопштија нејзините соработници.

Според нив, непознати лица утрово ја однеле Колесникова во непознат правец, а таа не одговарала на телефон.

Колесникова е член на опозицискиот Координативен совет, за кој се води истрага од белоруските власти.

Белоруската полиција денес соопшти дека 633 лица биле уапсени во вчерашните демонстрациите што се одржаа во Минск поради контроверзниот реизбор на Александар Лукашенко за претседател.

„Вчера беа приведени вкупно 633 лица за кршење на законот за масовни собири“, се наведува во соопштението на белоруското Министерство за внатрешни работи, прецизирајќи дека од нив 363 биле притворени.

Во Минск вчера протестираа повеќе од 100.000 лица, четврти викенд по ред, а голем број полицајци и војници беа распоредени на улиците.