Над илјада лица казнети во тетовско поради прекршоци околу возачката дозвола

Во текот на изминатите 11 месеци од оваа година, заклучно со денес на поширокото тетовско подрачје СВР Тетово има откриено и санкционирано 1182 лица кои управувале возила без положен возачки испит и валидна дозвола за тоа. На сите им се изготвени соодветни поднесоци и ќе се соочат со парична глоба од 300 евра во денарска противвредност.

-Во овој период, исто така, санкционирани се и 356 возачи-почетници кои не се придржувале кон законските ограничувања предвидени за оваа категорија возачи, а за кој прекршок предвидена е парична глоба од 200 евра. Секторот за внатрешни работи Тетово уште еднаш со апел – поединци да не седнуваат зад волан без претходно положен возачки испит и да не ја доведуваат во прашање сопствената и безбедноста на другите учесници во сообраќајот, информира портпаролот Марјан Јосифоски.

Секторот за внатрешни работи Тетово потсетува, исто така, дека и сопствениците на возилата кои им ги даваат на управување на лица без возачка дозвола се санкционираат согласно Законот за безбедност на сообраќајот на патиштата. Глобата и за овој законски прекршок е 300 евра во денарска противвредност.