Хакатони за идеи од студенти корисни за секторите туризам и земјоделство
Студентскиот парламент на Факултетот за информатички науки и компјутерско инженерство – ФИНКИ во изминатите два викенда организираше два хакатона (#ReFRESH: Agriculture & Tourism) виртуелни колаборативни настани на кои студентите од различни факултети тимски работеа за во рок од 48 часа да кодираат и создадат софтверски решенија применливи во секторите туризам и земјоделство.
Активноста се реализираше со поддршка на Швајцарската агенција за развој и соработка, преку Програмата за зголемување на пазарната вработливост – ИМЕ.
На хакатоните учествуваа 30 студенти од ФИНКИ, Факултетот за информатика и Факултетот за туризам при УТМС и Факултетот за земјоделски науки и храна кои поделени во тимови од три учесници и под менторство на професори развиваа идеи кои беа детектирани од претходни средби со компаниите од туризам и земјоделство.
Како што соопшти Студентскиот парламент на ФИНКИ, на хакатонот за туризам победи тим студенти кои предложија решение корисно за туроператорите бидејќи ќе им заштеди време и напор за известување и менаџирање на целиот синџир во турите кои ги организираат – превозници, сместувачки капацитети, ресторани, туристички водичи итн. Со самото резервирање на турата, автоматски ќе се испраќа мејл со агенда и сите вклучени во турата ќе знаат детали за својот ангажман.
На второорганизираниот хакатон, наменет за секторот земјоделство, победничка идеја беше платформа на која земјоделци можат да продаваат сертифицирани автохтони семиња кои се одобрени од Министерството за земјоделство. Освен продажба, платформата ќе има и форум со прашања на оваа тематика.
Двата победнички тима имаат уште четири месеци да ги доразвијат софтверските решенија, кои потоа ќе бидат понудени како готови продукти пред компании од двата сектора. И останатите тимови кои беа дел од овој настан ќе можат да ги презентираат своите решенија и доколку некоја од компаниите има потреба од такво решение, ќе може да го финансира до негова имплементација.
– Хакатоните беа одлична можност за студентите, преку соработка со колеги и професори, да го применат своето знаење работејќи на реални проблеми од секторите. Од друга страна, на фирмите од двата сектора им се понудија решенија за дигитализација и осовременување на нивната работа, соопшти Стдентскиот парламент на ФИНКИ.
Покрај хакатонот #ReFRESH: Agriculture & Tourism, СП ФИНКИ организира и други хакатони и активности за подобрување и зголемување на студентските знаења, за кои заинтересираните може да се информираат повеќе на социјалните мрежи Фејсбук, Инстаграм и на каналот Јутјуб.
