Даночни пријави: Драстично намален износот на доход кај највисоко рангираните граѓани минатата година во споредба со 2018

Најголем доход од капитална добивка има остварено Скопјанец кој продал сопственички удел во странска компанија и притоа заработил 88 милиони 352 илјади 113 денари, а највисоката дивиденда му е исплатена на Битолачнец, кој е сопственик ан бизнис од областа на градежништвото, соопти денеска директорката на Управата за јавни приходи Сања Лукаревска.

Самостојното вршење на дејност е најпрофитабилно за скопјани и во 10-те најдобро рангирани се наоѓаат адвокати, извршители и угостители. Земјоделството е најисплатливо во Скопскиот регион каде граѓанин од продажба на сопствени земјоделски производи остварил доход од 32 милиони 345 илјади 815 денари. Највисокиот доход од закуп е остварен во Тетово, а највисокиот доход од авторски права во Скопје. Највисокиот доход од права на индустриска сопственост е остварен во Куманово.

Според податоците на УЈП, Скопјанка од лото обложување и учество во наградни игри заработила 29 милиони 293 илјади 930 денари, а прворангираниот пензионер е од Штип со бруто пензија од 8 милиони 064 илјади денари.

Според директорката на УЈП, иако општите бројки се зголемени, сепак на индивидуално ниво износот на доход кај највисоко рангираните граѓани не ги достигнал износите на доход од 2018 година.

Кај 35.363 граѓани утврден е бруто доход над еден милион денари, додека најголемиот број на граѓани односно 638.210 оствариле бруто доход кој се движи од 100 илјади до еден милион денари.

Во 2019 година шест граѓани оствариле доход над 100 милиони денари што претставува намалување во однос на 2018 година кога имало 31 таков граѓанин. Вкупно 426 граѓани оствариле доход од 10 до 100 милиони денари.