Поднесено обвинение против жител на Свети Николе за тешка кражба

Основното јавно обвинителство во Скопје поднесе обвинение до Кривичниот суд Скопје против едно лице за продолжено кривично дело „тешка кражба“.

Од ОЈО денеска информираа дека на 11-ти овој месец, 24-годишниот жител на Свети Николе извршил две временски поврзани дејствија кои претставуваат повеќекратно остварување на истото кривично дело.

На улицата „Трифун Хаџи Јанев“ во населбата Автокоманда ограбил жена на која ѝ пришол од зад грб и ѝ ја одзел чантата во која имало паричник и други предмети со вкупна вредност од 4.500 денари. Потоа, се упатил кон Факултетот за земјоделски науки и храна каде ја разбил надворешна врата на амфитеатарот и пребарувајќи скршил уште четири врати од други простории, но чуварот го затекнал и го спречил во намерата. Откако бил приведен, кај него е пронајдена украдената чанта.

Од страна на јавниот обвинител е доставен предлог за продолжување на притворската мерка.