Одземени две возила во Тетово поради истечена регистрација повеќе од шест месеци

Тетовската полиција вчера одзела две возила поради истечена регистрација повеќе од шест месеци. Од стапувањето во сила на законските измени кон крајот на декември минатата година, на поширокото тетовско подрачје, заклучно со денеска, вкупно се одземени 27 возила, од кои 26 за истечена регистрација и едно за бучавост.

-Вчера околу 15:30 часот на улицата „Маршал Тито“ во Тетово, полициски службеници на СВР Тетово времено одзеле патничко моторно возило, управувано од 19-годишниот Е.Р. од скопско Бојане, кое не било регистрирано повеќе од шест месеци. Против сопственикот на возилото ќе следува соодветен поднесок по член 344 точка 3 од Законот за безбедност на сообраќајот на патиштата, инфомира Марјан Јосифоски, портпарол на СВР Тетово.

Второ возило било одземено неколку часа подоцна во 18:45 часот на улицата „Илинденска“ во Тетово.

-Времено било одземено и патничко моторно возило со тетовски регистарски ознаки, што го управувал 38-годишниот тетовец Ј.А. кое не било регистрирано повеќе од шест месеци. Против сопственикот на ова возило ќе биде изготвен поднесок, информира Јосифоски.

Глобата за овој прекршок изнесува 500 евра во денарска противвредност.