Бугарското здружение на хотели и ресторани ја повика Владата да не се конфронтира со Русија

Бугарија да ја искористи ситуацијата со откажаните летови на руски туристи кон Турција поради зголемувањето на бројот на болни од Ковид-19 и брзо да им издаде визи на руските гости, побара најголемото здружение на хотели и ресторани во земјата.

Дописникот на МИА од Софија известува дека Здружението предупредува дека Министерството за надворешни работи на Бугарија треба да биде претпазливо со своите коментари за Русија.

„Не е добро време од економски аспект бугарското Министерство за надворешни работи да прави политика и да се обиде да покаже мускули преку остри изјави против Руската Федерација, бидејќи тоа е штетно за нашата економија. И без економија нема политика“, соопшти здружението.

Во последните години, бројот на руски туристи опаѓа, а состојбата со коронавирусот дополнително влијаеше на нивниот проток во Бугарија.

– ТУРЦИЈА Е ПОПУЛАРНА ДЕСТИНАЦИЈА ЗА РУСКИТЕ ТУРИСТИ И ЛОГИЧНО Е ТИЕ ДА БАРААТ УДОБНА АЛТЕРНАТИВА ЗА ВЕЌЕ ПЛАНИРАНИТЕ ОДМОРИ, КОМЕНТИРА ПРЕТСЕДАТЕЛОТ НА БУГАРСКОТО ЗДРУЖЕНИЕ ЗА ХОТЕЛИ И РЕСТОРАНИ ГЕОРГИ ШТЕРЕВ.

Според него, неактивноста на бугарското Министерство за надворешни работи може да биде фатална за целиот туристички сектор во земјата. Неопходно е да се почне со издавање на влезни визи за руски туристи во Бугарија, затоа што ако земјата не успее да ја искористи ситуацијата, конкурентите од Кипар и Египет не спијат и веќе почнале да им издаваат визи на руските туристи. посочуваат од бугарското здружение.

Русија вчера соопшти дека од 15 април ќе ги прекине редовните и чартер летови кон Турција.