Започнува реконструкција на улицата „Народен Фронт“ во Општина Центар

Започнува комплетната реконструкција на улицата „Народен Фронт“, во Општина Центар.

Реконструкцијата опфаќа целосно уредување на коловозната конструкција на површина од 11.542 метри квадратни и трите краци на улицата, што минуваат меѓу зградите, информираат од Општина Центар.

По должина на улицата „Народен Фронт“ ќе се реконструираат и подигнатите пешачки платоа за смирување на сообраќајот, а ќе биде поставено и ново енергетски ефикасно ЛЕД-осветлување.

– Реконструкцијата ќе опфати и обнова на тротоарите, а ќе се воведе и резидентно паркирање за сите станари, се вели во соопштението.

Општина Центар апелира до граѓаните да бидат внимателни при движењето и одвивањето на сообраќајот во периодот додека траат градежните активности.