До кога земјоделците ќе молат за парите од петтиот ковид пакет?

Македонските земјоделци уште ја чекаат помошта ветена од Владата во рамки на петтиот ковид пакет. Бараат итна исплата, за која се сомневаат дека ќе биде изведена за предизборен поткуп.

-Бараме на првата седница која ќе ја свикате во Собранието да го изгласате тој фамозен Петти пакет, бидејќи тие средства нам ни се потребни веднаш и сега. А секое друго одложување ќе го сметаме како вршење притисок и начин за поткуп за изборите кои следат, апелираат тие.

Координаторот на новоформираните тутунски здруженија, Игор Мирчески, за Алфа коментира дека состојбата е повеќе од очајна. Дотолку повеќе што последното невреме уништило 80 проценти од плодот кај голем дел од нив.

-Во оваа реколта трпиме огромни штети од неповолните временски услови, настанати од сушата и од врнежите од град каде во некои реони, родот на тутунопроизводителите и земјоделците им е уништен и преку 80 проценти. Исто така, бараме и вклучување на тутунарите и сточарите во мерката „зелена нафта“, бидејќи, ако сте заборавиле и ние нивите ги обработуваме со трактори и друга механизација, реагираат од Здружението на новоформираните тутунски здруженија.

Се заканија со повторно излегување на улица ако и овие барања бидат изигнорирани.