Од МФ велат дека „Стандард и Пурс“ го потврдија кредитниот рејтинг на земјава, опозицијата вели дека власта се фали со „ѓубре“ рејтинг
Кредитната агенција „Стандард и Пурс“ го потврди кредитниот рејтинг на земјава, ББ- со стабилен изглед. Стабилниот изглед како што се нотира во извештајот кој го објавува кредитната агенција за РС Македонија, ги рефлектира очекувањата дека проектираното економско заздравување на нашата држава ќе помогне во лимитирање на фискалниот и надворешниот дефицит во следната година, информира Министерството за финансии (МФ).
Агенцијата нотира дека рејтингот може да се зголеми доколку континуираните структурни реформи ги зајакнат институционалните капацитети истовремено зачувувајќи ги одржливите фискални политики.
Аспирациите за пристапување на нашата држава кон ЕУ може да бидат сидро за таквите институционални подобрувања и напредок на структурните реформи, се истакнува во извештајот.
– Економијата на РС Македонија се опоравува од последиците од пандемијата. И покрај котракцијата во првото тримесечје, очекуваме дека економијата ќе оствари раст од 3,7 проценти. Растот е придвижен од здравото закрепнување на странската побарувачка, којашто ги рефлектира спецификите на интеграцијата на РС Македонија во меѓународните синџири на добавувачи, како и приватната потрошувачка, како резултат на придобивките од заздравувањето на приватните трансфери и од владините мерки за поддршка на стопанството коишто го ублажија расположливиот доход, се вели во извештајот.
Потенцијалното влошување на состојбата со пандемијата и придружните ограничувања остануваат ризик за економското закрепнување, но како што забележува кредитната агенција „извозот на земјата се покажа отпорен на наметнатите ограничувања“.
Во однос на државниот долг агенцијата очекува да достигне 58 проценти од БДП до 2024 година.
Истовремено Законот за буџети, којшто е во процедура на носење, може да помогне во зацврстување на прудентните фискални политики и зајакнување на фискалната рамка.
-Надворешната отпорност на РС Македонија се огледува во способноста во привлекување странски инвестиции особено во областа на извозниот сектор, што може да се види и во состојбата на дефицитот на тековната сметка. Се очекува овој позитивен тренд да продолжи и во периодот од 2021 – 2024, се нотира во извештајот на кредитната агенција.
Од позицијата пак информираат дека Република Македонија е сместена во категоријата „junk“.
- Економските параметри потврдуваат дека економијата според Стандард и Пурс е ѓубре. Македонија е рангирана во државите кои имаат ризик од состојба да бидат во неможност да ги сервисираат своите долгови, со други зборови кажано Заев ја води државата кон банкрот.
За само 4 години Заев го зголеми јавниот долг речиси двојно. Заев ја задолжи државата за скоро 3 милијарди евра нов долг, со тие пари нема направено ниту еден нов проект, нема нови патишта, нема болници, нема школи.
За само една година Заев и СДСМ оставија 60.000 луѓе без работа.
5.600 фирми ставија клуч на врата поради лошите политики на власта.
Буквално половина милион луѓе гладуваат со 2 евра на ден.
Сите живеат полошо, само Заев и луѓето околу него подобро, велат од ВМРО-ДПМНЕ
