Скопјанец под истрага заради поседување автоматско оружје​

Основното јавно обвинителство Скопје донесе наредба за спроведување истражна постапка против скопјанец на возраст од 35 години, заради основано сомнение дека сторил кривично дело „недозволено изработување, држење и тргување со оружје или распрскувачки материи“ од член 396 став 2 во врска со став 1 од Кривичниот законик.

Како што информира ОЈО, вчера при претрес во домот на осомничениот било пронајдено огнено оружје кое тој неовластено го држел и тоа автоматска пушка калибар 7,62 х 39 мм „Калашников АК 47“, две рамки од автоматска пушка и 41 куршум боева муниција со калибар 7,62 х 39 мм.

Поради постоење на опасност од бегство и околности кои го оправдуваат стравот дека осомничениот би можел да го повтори кривичното дело, јавниот обвинител до судија на претходна постапка достави предлог за определување мерка притвор за осомниченото лице.