ЕБОР ќе ја поддржи Владата во реализација на приоритетните проекти

Реализацијата на тековните проекти и динамиката на нивното изведување, како и инвестиции во нови проекти од областа на патната и железничката инфраструктура, енергетиката, екологијата, беа тема на денешната средбата на министерот за финансии Фатмир Бесими со потпретседателот на ЕБОР Јурген Ригтеринк, што се одржа во Министерството за финансии, пред почетокот на Првата годишна конференција „Економско заздравување и раст по Ковид“.

На средбата, информираат од Министерството за финансии, беше истакнато дека ЕБОР ќе ја продолжи соработката со земјава и ќе ја поддржи посветеноста на Владата во подготовката и реализацијата на приоритетните проекти кои се дел од економскиот инвестициски план на ЕУ за Западен Балкан.

Меѓу проектите кои се работат со финансиска поддршка од ЕБОР се делницата Скопје-Блаце, автопатската делница Кичево-Гостивар, железничката пруга од Коридорот 8 кон Бугарија, во делот на енергетиката магистралниот гасовод Гостивар-Кичево и делница Свети Николе -Велес, изградба на интерконективниот гасовод со Грција, 400 киловолтна интерконекција Битола-Елбасан со Албанија, како и други проекти меѓу кои и во Скопје за брз автобуски превоз, како и пречистителната станица на отпадни води.

Беше изразено задоволство од напредокот во реализација на проектите што се финансираат од оваа меѓународна финансиска институција и посветеноста од страна на Владата во непречена нивна имплементација.

На средбата меѓу другото беше посочено дека од клучно значење ќе биде и вклучување на Банката во реализација на проектот за управување со цврст отпад во пет региони во земјава кој е во процес на подготовка од страна на Министерството за животна средина и просторно планирање.

-ЕБОР останува наш стратешки партнер и во остварувањето на Планот за финансирање на заздравувањето и забрзаниот економски раст кој се очекува да ги зголеми вкупните инвестиции во економијата, истакна на средбата министерот Бесими.

Покрај планираните јавни инвестиции во износ од околу четири милијарди евра во периодот од 2021 до 2025 година, финансирани од Буџетот, ИПА фондовите и меѓународните финансиски институции ќе се мобилизираат и повеќе средства и инвестиции од приватниот сектор. Со тоа ќе се зголемат вкупните инвестиции, ќе се забрза растот на бруто домашниот производ и ќе се забрза отворањето нови работни места.

Извесно е дека опоравувањето на економијата од ефектите од корона-кризата започна. Статистички годинава земјата излегува од криза и влегува во раст и заздравување, а проекциите за раст се 4,1 отсто.

ЕБОР во земјава има инвестирано над две милијарди евра.