Јавна дебата за нацрт-текстот на националната стратегија за развој на земјоделските задруги

Во Министерството за земјоделство, шумарство и водостопанство денеска се одржа јавна дебата за нацрт-текстот на националната стратегија за развој на земјоделските задруги за периодот 2022-2028 година.

Во присуство на претставници од проектот „Поддршка за развој на земјоделски задруги“, поздравни обраќања имаа министерот за земјоделство, шумарство и водостопанство, Арјанит Хоџа, програмскиот менаџер на Делегацијата на ЕУ, Костантинос Соупилас и проектниот менаџер CARE International, Драган Периќ. Презентација на темата одржаа меѓународниот експерт Дарио Какамизи и проф. д-р Емељ Туна од Факултетот за земјоделски науки и храна.

– Во изминатиот период Министерството направи сериозен исчекор во развојот и поддршката на задругарството. Потребата за стратегија се наметна како логичен чекор по успехот на мерката 131 од Програмата за финансиска поддршка на руралниот развој, која придонесе да се зголеми интересот кај земјоделците за здружување во задруги. Тие ја препознаа поддршката од државата и реалниот бенефит кој го имаат од членството во задруги, па следствено на ова, секоја година бројот на задруги расте и денес веќе имаме регистрирани 66 задруги. Моделот на здружување на земјоделците е растечки тренд во светски рамки. Македонскиот агросектор успешно го следи овој модел, па потребата за креирање стратегија за уште поголем развој, беше реална потреба, беше речено на дебатата.

Министерот Хоџа искажа големо задоволство што оваа национална стратегија се прави првпат од осамостојувањето на државата и е само уште една потврда за сериозниот пристап на Министерството.

– Стратегијата е изготвена во рамките на проектните активности реализирани од проектот „Поддршка за развој на земјоделски задруги“, финансиски поддржан од Европската унија, а имплементиран од страна на CARE International и Македонската развојна фондација за претпријатија (МРФП). Согласно законските предуслови за јавна достапност, стратегијата беше објавена на веб страната на Министерството, со цел да ја повикаме најшироката јавност да го изрази своето мислење, и да предложи конкретни подобрувања, рече Хоџа.

Програмскиот менаџер на Делегацијата на ЕУ, Соупилас, изрази задоволство од напредокот на задругарството како една од политиките за развој на руралните средини и мерка која, како што истакна. ќе придонесе да се намали миграцијата од село во град.

Проектниот менаџер од CARE, Периќ посочи дека најголемиот бенефит од стратегијата ќе биде зголемувањето на членството на задругите.

– Денешната јавна расправа има цел да ја претстави состојбата во областа на задругарството, стратешките цели (долгорочни и краткорочни) и намерите за развој на земјоделските задруги, среднорочните насоки за развој и поддршка на земјоделските задруги и активностите за нивна реализација, очекуваните ефекти и потребните финансиски средства за спроведување на стратешките приоритети. Стратегијата ги дефинира основните цели и активности за периодот 2022-2028 година, со цел да се создаде правна, финансиска и институционална рамка за развој на економското здружување на земјоделските стопанства во земјоделски задруги. Целта е развој на одржлив екосистем кој ќе допринесе во поттикнување, препознавање, поддршка и развој на земјоделските задруги во земјава, наведува МЗШВ.

Стратегијата предвидува мерки и активности групирани во пет стратешки приоритети: конкурентност и ефикасност: технолошкиот и финансискиот аспект на земјоделските задруги, ефективност на владините интервенции и јавното учество: идеолошките и политичките аспекти на земјоделските задруги, земјоделските задруги и општеството работат заедно за одржлив раст: социјалните аспекти на земјоделските задруги, осврт на климатските промени и еколошката одржливост: еколошките аспекти на земјоделските задруги и пристап до комуникации, медиуми и дигитализација: медиумските аспекти на земјоделските задруги.