Азески и Османи на средба за регионалната соработка и можностите за нејзино продлабочување

Копрeтседателот на Управниот одбор на Коморскиот инвестициски форум со седиште во Трст и претседател на Стопанската комора на Македонија, Бранко Азески, придружуван од Горан Свилановиќ, советник на претседателот на Комората за регионални прашања, ќе остварат работна средба со министерот за надворешни работи Бујар Османи. Фокусот на разговорите, како што информираат од Стопанската комора, ќе биде регионалната соработка и можностите за нејзино продлабочување.

-Во таа насока, Горан Свилановиќ, како советник на претседателот Азески, ќе даде придонес во потенцирање на можностите и потребата од продлабочување на регионалната соработка преку механизмите и институциите кои се активни по повеќе основи, формирани со поддршка на ЕУ во текот на изминатата деценија, велат од Стопанската комора.

Конкретно, додаваат, со поддршка на ЕУ, формирани се организации кои го поддржуваат пренесувањето на европските правила за водење бизнис во нашите земји.

-Тоа се Енергетската заедница, ЦЕФТА, Регионален совет за соработка (РЦЦ), Транспортна заедница и Регионалната академија за јавна администрација. Стопанските комори од Западен Балкан, од своја страна, ја поврзаа деловната заедница преку Коморскиот инвестициски форум (КИФ), како оригинална регионална иницијатива која е автентичен глас на деловната заедница која сака да ги искористи сите потенцијали на регионалниот балкански пазар кој работи по европски правила, прецизираат од Стопанската комора.

Имено, Унијата инвестираше огромни суми пари во организациска инфраструктура што треба да помогне во зајакнување на економската соработка меѓу земјите од регионот, да се зајакне регионалниот пазар на Западен Балкан и економската соработка на целокупниот бизнис од Балканот со европските бизниси како дел од процесот на пристапување на нашите земји во Европската Унија.

Средбата на Азески и Свилановиќ со Османи се реализира и во пресрет на уште две регионално-меѓународни деловни активности. Наредната средба на Отворен Балкан која ќе се одржи на почетокот на ноември во Белград и средбата во Будимпешта меѓу Коморите на Западен Балкан и на Вишеградската група.

-На работната средба во Министерството за надворешни работи ќе стане збор и за интензивирање на активностите на бизнис комитетот за трговски марки, формиран согласно Преспанскиот договор со Грција помеѓу бизнис заедниците од двете земји, потенцираат од Стопанската комора.