Изминатата недела регистрирани 358 казни за неправилно паркирање во Тетово

Засилените контроли за непрописното паркирање во Тетово изминатава недела резултираа со 358 казни за возачите, информираат од полицијата. Дел од овие казнетите возачи треба да платат и за тоа што специјалното возило „пајак“ ги подигнал нивните возила.

-За една недела, колку што досега се реализираат засилените мерки и активности за поголем ред и безбедност со паркирањето во Тетово, полициските службеници на СВР Тетово – Полициска станица за безбедност на сообраќајот Тетово вкупно откриле и санкционирале 358 непрописно паркирани возила, претежно на улиците „Илинденска“ и „Маршал Тито“, двете најфрекфентни улици во централното градско подрачје. Покрај ова, од двете споменати улици биле отстранети, односно од „пајак-службата“ подигнати 89 непрописно паркирани возила, кои го попречувале нормалното и безбедно движење на пешаците и на другите учесници во сообраќајот, информира портпаролот на СВР Тетово, Марјан Јосифоски.

Најголемиот број од изречените мерки во овој период се однесувале на паркирање во таканаречени „двојни редови“ и спротивно на поставените сообраќајни знаци.

-Активностите околу паркирањето во Тетово со несмалено темпо продолжуваат и наредните денови, а СВР Тетово повторно со апел до возачите целосно да се придржуваат кон утврдениот режим за паркирање и да не ги оставаат нивните возила каде ќе стигнат, пред се паркирани во „двојни редови“, зашто фрекфренцијата по тетовските улици од скоро е мошне голема, посебно во периодот од 10 до 20 часот. Активностите се планира да ги опфатат и другите улици во градот, рече Јосифоски.

На сите прекршители изготвени им се законски предвидените поднесоци и ги очекуваат парични глоби.