Кошаркарките на Баскет Кам 2011 го одбранија трофејот во кошаркарскиот куп

Во драматично финале во кое победникот беше одлучен по продолжение, кошаркарките на Баскет Кам 2011 го совладаа вечерва во Скопје Бадел 1862 со 64-61 (58-58, 37-30) и го одбранија трофејот во Македонскиот куп „Благоја Георгиевски – Буштур“.

За екипата од Македонска Каменица ова е втора куп титула, додека Бадел 1862 остана на трите трофеи под тоа име освоени во серија (2017, 2018 и 2019).

Во вечерашното финале кошаркарките на Баскет Кам влегоа во завршните десет минути од регуларниот дел со предност од 49-40, но Бадел 1862 со серија од 10-0 на стартот од четвртата четвртина навести неизвесна завршница.

Откако финалето во регуларниот дел заврши 58-58, кошаркарките на Баскет Кам подобро се снајдоа во продолжението и на крајот се радуваа на вториот куп трофеј во клупската историја.

Најефикасна во редовите на Баскет Кам беше српската интернационалка Кристина Пуљизовиќ со 23 поени и 17 скокови, додека Александра Стојановска со 22 кошеви беше најистакната во составот на Бадел 1862.