Додека Битиќи вели дека моделот за цените на нафтените деривати е одржлив, РКЕ ги зголеми цените на горивата

Сметаме дека е подобар и одржлив моделот што го предложивме за намалување на цените на нафтените деривати отколку да одевме со еднократно намалување на акцизите, истакна вечерва вицепремиерот за економски прашања Фатмир Битиќи.

-Гарантираме дека овој модел независно дали имаме пораст на цена на берза или намалување ќе осигура намалување на цените и ќе ја постигне целта затоа што има два параметра кои се битни. Со опаѓање на цената на берза има дел од акцизата за кој велиме ќе го вадиме и се откажуваме од приход и дополнително се откажуваме од 8 процентни поени од ДДВ за сите нафтени деривати и за гасот. Многу е лесно да кажете дека во овој момент треба да ги намалиме акцизите за 50 или 60 или, пак, за 100 отсто, но кои се реперкусиите за тоа. Секогаш треба да се грижите за приходната страна и да знаете кој ќе биде негативниот ефект, рече Битиќи во емисијата Топ тема на ТВ Телма.

За мерките , како што кажа , во понеделникот вечерта биле консултирани голем број на експерти од експертската јавност.

-Двете законски решенија за измена на акцизата и на ДДВ-то заедно со за другите мерки кои денеска ги донесовме се веќе на пат кон Собранието и пратениците наскоро треба да ги гласат. Ги испративме до Собранието по скратена постапка. Скратената постапка може да заврши за три дена, може и за еден ден, а може и за два часа. Разум треба да покажеме сите и затоа ги повикавме пратениците да бидат на ниво на задачата, рече Битиќи и додаде дека не верува оти ќе има опструкции.

Универзитетскиот професор Маријан Петрески 26-те мерки што денеска го донесе Владата ги оцени како релативно навреме донесени, поточно порано отколку што беа донесени мерките за пандемијата, но додаде дека можеби нивната подготовка требало да почне и порано доколку се земе во предвид дека на 5 ноември земјава добила разузнавачки информации дека ќе се случи инвазијата на Украина.

-Мислам дека е коректно она што денеска беше објавено како мерки како почетна информација за да влијае во насока на смирување на паниката и тензијата меѓу населението. Од сетот мерки кој беше објавен три до четири се особено релевантни за сегашниот момент, а има и некои мерки кои и претходно биле објавени, рече Петрески и додаде дека мерките не им биле претставени на експертите во понеделникот кога беа повикани во Владата на консултации за донесување на новиот сет на мерки и воопшто не дискутирале за нив.

Приходите во Буџетот од акцизи лани биле 22 милијарди денари, а само од акцизите од енергенсите изнесувале 12 милијарди денари. Калкулациите од воведување на новите мерки од страната на Владата покажуваат дека ќе чинат околу 90 милиони евра