КИФ вторпат организираше заеднички саемски настап на компании од Западен Балкан

Копретседателот на Коморскиот инвестициски форум (КИФ), Бранко Азески, и потпретседателката на Стопанската комора на Македонија, Елена Милевска Штрбевска, се домаќини на 23 Меѓународен бизнис саем што се одржува во Мостар, заедно со претседателот на Надворешно-трговската комора на Босна и Херцеговина, Ахмет Егрлиќ. Ова е втора саемска манифестација (после Саемот во Тирана што се одржа во декември минатата година) на која стопанските комори од регионот од шесте земји на Западен Балкан имаат заеднички настап, преку Коморскиот инвестициски форум (КИФ).

– Во разговорите со претставниците на КИФ и на коморите, со оглед на актуелниот момент на мултикриза, се разговараше за интензивирање на регионалната соработка, која е реален одговор на потребата за намалување на нивниот негативните ефекти врз работата на компаниите, соопшти денеска Стопанската комора на Македонија.

Мостарскиот саем е една од најпрестижните манифестации во регионот и секоја година собира најголем број бизнисмени, премиери и претставници на сите важни институции од регионот. Годинава учествуваат 39 компании од земјите на Западен Балкан, меѓу кои и четири македонски компании, а за нивното учество трошоците се покриени од страна на КИФ.

На Мостарскиот саем се одржаа B2B средби на компаниите учесници, претежно од секторите земјоделство и прехранбена индустрија, информатички и телекомуникациски технологии, туризам, градежништво и метална и електро-индустрија.

Штандот на коморите и на КИФ го посети и Сташа Кошарац, министер за надворешна трговија и економски односи на БИХ.

Коморскиот инвестициски форум е основан како асоцијација на шесте национални комори од регионот на Западен Балкан, со цел да се интензивира регионалната економска соработка и да се покренуваат заеднички активности кои се од интерес за бизнис-заедницата од регионот. КИФ претставува повеќе од 350.000 компании од регионот на Западен Балкан, претежно мали и средни претпријатија, настојувајќи да отвори нови можности за посилно вмрежување на деловните заедници во регионот преку отстранување на преостанатите пречки за развој на регионалната економска соработка и подобрување на деловната и инвестициската клима на пазарите во регионот на Западен Балкан.

Азески и Милевска Штрбевска вчера во Сараево имаа разговори со раководството на Надворешно-трговската комора на БиХ – партнер на Стопанската комора на Македонија во сите регионални проекти. Во разговорите, информира Стопанската комора, се прецизираа обврските за наредниот период, кој ќе помине во силен налет на кризата и ќе остави последици врз бизнисите кои ги претставуваат.

Вкупната трговска размена на Македонија со Босна и Херцеговина во 2021 година изнесува 194,2 милиони долари, со раст од 18 проценти споредено со 2020 година. Извозот изнесува 112,3 милиони долари, со раст од 24 проценти, додека увозот изнесува 81,8 милиони долари, со раст од 11 проценти во споредба со минатата година. Истиот тренд на трговска размена се задржува и годинанава. Најзастапени производи во извозот се лекови, цевки, месни преработки, вино, конзервиран зеленчук и електрични акумулатори, додека во увозот од БиХ се млекото и млечните производи, месни преработки, слатки и производи од дрвната индустрија.