Украдени над 20 капаци на шахти од новиот колекторски систем во Зајас

На потегот од пречистителната станица во кичевското село Зајас, украдени се околу 20 метални капаци од шахтите, информира директорот на ЈКП „Комуналец" – Кичево, Зенел Јонузи.

Тој посочи дека и претходно се соочиле со ваков проблем, но сега штетата е најголема. Јонузи додаде дека полицијата е запознаена со случајот, но нема соодветно решение со кое трајно ќе се реши овој проблем.

Директорот на ЈКП „Комуналец" апелираше до сите граѓани и жители на општината, да не го прават тоа, бидејќи колекторот ним ќе им служи и истиот се гради за нивно добро и нагласи дека досега само по тој основ на овој крак од колекторскиот систем направена е материјална штета од над 5000 евра.