Промоција на првата Лексикологија на македонскиот јазик од Симона Груевска Маџовска

На Зелениот покрив ГТЦ, вечерва од 19 часот ќе се одржи промоција на монографијата „Лексикологија на македонскиот јазик“ од професор д-р Симона Груевска Маџоска, која е производ на заложбите на Книгоиздателството Ми-Ан за континуирана поддршка на научната мисла од областа на хуманистиката, особено на македонистиката.

Како што информираат од Институтот за комуникациски студии (ИКС), Симона Груевска Маџоска е авторка на првата книга посветена на лексикологијата на македонскиот јазик.

– Оваа книга се вика Лексикологија на македонскиот јазик, но, секако, прашањата што се третираат ѝ припаѓаат на универзалната лексикологија зашто дефинициите на зборот, на лексичкото значење, синонимијата итн. се однесуваат на сите јазици. Таа претставува лексикологија на македонскиот јазик зашто примерите се од македонскиот јазик и нема контрастивни и компаративни истражувања со другите јазици, но, тоа е карактеристика на сите учебници по лексикологија што се објавени досега, исто како и кај синтаксата, стилистиката итн., стои во соопштението од ИКС.

Промотори на монографијата ќе бидат проф. д-р Димитар Пандев и д-р Емил Ниами.

Симона Груевска-Маџоска од септември 1998 година е избрана во звањето асистент-истражувач на Одделението за лексикологија и лексикографија во Институтот за македонски јазик „Крсте Мисирков“, во 2006 година е избрана во звањето виш научен соработник, а во 2012 во звањето научен советник/редовен професор.

Автор е на повеќе статии од областа на лексикологијата, стилистиката и социолингвистиката, Во 2009 година, излезе од печат нејзиниот монографски труд „Лексичка синонимија во македонскиот стандарден јазик“, а во 2010 година „Социолингвистички огледи“.

Од ИКС дополнуваат дека книгата е наменета за стручната јавност, но, како што посочуваат, таа ќе биде корисна и нужна и за сите оние кои се интересираат за македонскиот јазик и лингвистиката воопшто.