Во Кавадарци промовиран романот ,,Денот на црвот”

Кавадарци денеска беше промовиран романот „Денот на црвот“, добитник на наградата за роман на годината 2021 година, којашто ја доделува Фондацијата „Славко Јаневски“. Автор на делото издадено од „Или-Или“, е Симона Јованоска, родена 1985 година. Ова е прв нејзин роман, претходно има објавено книга со раскази.

Ѕвездан Георгиевски, извршен директор на Фондацијата, рече дека врачувањето на оваа награда е успешен културен проект. Тој нагласи дека е ова значајна награда, којашто се доделува по 23 пат и придонесува за приближување на книгите до читателите. Георгиевски додаде дека интересот за пишување романи е значително зголемен.

Промоторката, Ноне Ноциќ ја претстави книгата низ разговор со лауреатката. Таа рече дека и е чест и задоволство да разговара со добитничката, на, како што нагласи, најпрестижната македонска награда за литература.

– Симона Јованоска е писателка којашто допрва ќе ги доживее своите ѕвездени моменти, во тоа сум сигурна. Затоа што го проучува животот, таа е извонреден раскажувач, метафоричар, колекционер на човечки судбини и приказни, нагласи Ноциќ.

Таа рече дека ова дело ќе остави траен белег во македонската книжевност.

Јовановска рече дека ликовите во романот се обични, од секојдневието.

– Мене ме инспирираат луѓето коишто јас лично ги знам и коишто сум ги запознала, откри авторката на романот.