Сет за лов на вампири ставен на аукција, привлече интерес ширум цел свет

Комплет орудија за лов на вампири од 19. век, којшто му припаѓал на член на Горниот дом на британскиот Парламент, е продаден на наддавање во Велика Британија. Ова е објавено на страницата на аукциската куќа „Хансонс окшенирс“ (Hansons Auctioneers).

Чифт пиштоли, сад со света вода, Библија во готски стил, дрвен чекан, колец, бакарни свеќници, бројаници и полициски документи од минатиот, 20. век биле ставени во ковчег со две месингани распетија на врвот… Сѐ тоа првично е проценето на 2.000 – 3.000 фунти. На аукцијата, цената на колекцијата достигна околу шест пати повисока цена, па на крајот неименуван купувач од Велика Британија платил 16.900 фунти, земајќи ги предвид и дополнителните трошоци.

Првиот сопственик на артефактите бил Вилијам Малком Хејли – првиот барон Хејли. Меѓу 1920 и 1930 година тој бил гувернер на Пенџаб, а потоа и на обединетите покраини Агра и Ауда во Британска Индија. Неговите иницијали се испишани на предметите.

– Без разлика дали се работи за суеверие, страв или само хоби, сепак е многу интересно да се знае дека овој комплет бил во посед на човек од високото општество и член на Домот на лордовите, изјави сопственикот на аукциската куќа, Чарлс Хансон.

Тој вели дека предметите привлекле огромен интерес кај купувачи од целиот свет – Франција, САД, Канада, Австралија и други.